ಪ್ರೊ|| ಎಂ ಕೃಷ್ಣೇಗೌಡ ಅವರಿಗೆ ‘ಮುದ್ದುರಾಮ ಪ್ರಶಸ್ತಿ’ ಗೌರವ – 2026
ನಿನ್ನೆ 26-July-2026 ಮೈಸೂರಿನ ಜೆ.ಎಸ್.ಎಸ್. ಮಹಿಳಾ ಕಾಲೇಜಿನ ನವಜ್ಯೋತಿ ಸಭಾಂಗಣದಲ್ಲಿ ನಡೆದ ‘ಮುದ್ದುರಾಮ ಪ್ರಶಸ್ತಿ’ ಪ್ರದಾನ ಸಮಾರಂಭವು ಅತ್ಯಂತ ಯಶಸ್ವಿಯಾಗಿ ಮತ್ತು ಅರ್ಥಪೂರ್ಣವಾಗಿ ನೆರವೇರಿತು. ಕಾರ್ಯಕ್ರಮದ ಅತ್ಯುತ್ತಮ ಸಂಘಟನೆ, ಗಣ್ಯರ ಉಪಸ್ಥಿತಿ ಹಾಗೂ ಪ್ರಶಸ್ತಿ ಪ್ರದಾನದ ಸನ್ನಿವೇಶವು ಸಭಿಕರ ಮನ ಗೆಲ್ಲುವಲ್ಲಿ ಸಂಪೂರ್ಣವಾಗಿ ಯಶಸ್ವಿಯಾಯಿತು. ಪ್ರಶಸ್ತಿ ಪುರಸ್ಕೃತರಾದ ಪ್ರೊ. ಎಂ. ಕೃಷ್ಣಗೌಡ ಅವರ ಉಪಸ್ಥಿತಿ ಮತ್ತು ಕಾರ್ಯಕ್ರಮದ ಪ್ರತಿಯೊಂದು ಕ್ಷಣವೂ ಸಾಹಿತ್ಯಾಸಕ್ತರಿಗೆ ಅಪಾರ ಸಂತಸವನ್ನು ನೀಡಿದ್ದಲ್ಲದೆ, ನೆರೆದಿದ್ದ ಪ್ರೇಕ್ಷಕರಿಂದ ಭಾರಿ ಮೆಚ್ಚುಗೆ ಹಾಗೂ ಶ್ಲಾಘನೆಗೆ ಪಾತ್ರವಾಯಿತು.
ಇದೇ ಸುಸಂದರ್ಭದಲ್ಲಿ, ಮುದ್ದುರಾಮ ಪ್ರತಿಷ್ಠಾನದ ಅಧ್ಯಕ್ಷರು ಹಾಗೂ ಹಿರಿಯ ಕವಿ-ಸಾಹಿತಿಗಳಾದ ಕೆ.ಸಿ. ಶಿವಪ್ಪ ಅವರು ನಿನ್ನೆಯೇ (26-July-2026) ತಮ್ಮ 90ನೇ ವರ್ಷಕ್ಕೆ ಕಾಲಿಟ್ಟಿದ್ದು ಸಮಾರಂಭದ ಭಾವನಾತ್ಮಕ ಕ್ಷಣಗಳಿಗೆ ಸಾಕ್ಷಿಯಾಯಿತು. ತಮ್ಮ ನೆಚ್ಚಿನ ಕವಿಯ 90ನೇ ಜನ್ಮದಿನದ ಸುಸಂದರ್ಭದಲ್ಲೇ ಈ ಪ್ರಶಸ್ತಿ ಪ್ರದಾನ ಸಮಾರಂಭ ನೆರವೇರಿದ್ದು ನೆರೆದಿದ್ದ ಪ್ರೇಕ್ಷಕರನ್ನು ಅತ್ಯಂತ ಭಾವುಕರನ್ನಾಗಿಸಿತು. ಸಭಿಕರೆಲ್ಲರೂ ಅತ್ಯಂತ ಆತ್ಮೀಕತೆಯಿಂದ ಕೆ.ಸಿ. ಶಿವಪ್ಪ ಅವರಿಗೆ ಹುಟ್ಟುಹಬ್ಬದ ಶುಭಾಶಯ ಕೋರಿ, ಶುಭ ಹಾರೈಸಿದ ಸನ್ನಿವೇಶವು ಇಡೀ ಸಮಾರಂಭಕ್ಕೆ ವಿಶೇಷ ಮೆರುಗು ನೀಡಿತು.
ಪ್ರೊ. ಟಿ.ವಿ. ವೆಂಕಟಾಚಲ ಶಾಸ್ತ್ರಿ ಅವರಿಗೆ ‘ಮುದ್ದುರಾಮ ಪ್ರಶಸ್ತಿ’ ಗೌರವ – 2025
ಖ್ಯಾತ ಕನ್ನಡ ವಿದ್ವಾಂಸ ಟಿ.ವಿ. ವೆಂಕಟಾಚಲ ಶಾಸ್ತ್ರಿ ಅವರು ಚೌಪದಿ ಸಾಹಿತ್ಯಕ್ಕೆ ನೀಡಿದ ಕೊಡುಗೆಯನ್ನು ಗುರುತಿಸಿ 2025ರ ಮುದ್ದುರಾಮ ಪ್ರಶಸ್ತಿಗೆ ಆಯ್ಕೆಯಾಗಿದ್ದರು. ಮುದ್ದುರಾಮ ಪ್ರತಿಷ್ಠಾನವು ಸ್ಥಾಪಿಸಿರುವ ಈ ಪ್ರಶಸ್ತಿಯು ₹50,000 ನಗದು ಬಹುಮಾನ ಮತ್ತು ಪ್ರಶಸ್ತಿ ಪತ್ರವನ್ನು ಒಳಗೊಂಡಿತ್ತು.
ಪ್ರಶಸ್ತಿ ಪ್ರದಾನ ಸಮಾರಂಭವು ಸೆಪ್ಟೆಂಬರ್ 2 ರಂದು ಮೈಸೂರಿನ ಸರಸ್ವತಿಪುರಂನಲ್ಲಿರುವ ಜೆ.ಎಸ್.ಎಸ್. ಮಹಿಳಾ ಕಾಲೇಜಿನ ನವಜ್ಯೋತಿ ಸಭಾಂಗಣದಲ್ಲಿ ನಡೆಯಿತು. ಸುತ್ತೂರು ಮಠದ ಶಿವರಾತ್ರಿ ದೇಶಿಕೇಂದ್ರ ಸ್ವಾಮೀಜಿಯವರು ಅಭಿನಂದನಾ ಕಾರ್ಯಕ್ರಮದಲ್ಲಿ ಪ್ರಶಸ್ತಿಯನ್ನು ಪ್ರದಾನ ಮಾಡಿದರು. ಖ್ಯಾತ ಸಂಸ್ಕೃತ ವಿದ್ವಾಂಸ ಎಚ್.ವಿ. ನಾಗರಾಜ ರಾವ್ ಅವರು ಅಭಿನಂದನಾ ನುಡಿಗಳನ್ನಾಡಿದರು. ಈ ಸಂದರ್ಭದಲ್ಲಿ ಮುದ್ದುರಾಮ ಪ್ರತಿಷ್ಠಾನದ ಸ್ಮರಣ ಸಂಚಿಕೆಯಾದ ‘ಮುದ್ದುರಾಮ ಮಂಜರಿ’ ಬಿಡುಗಡೆಯಾಯಿತು. ಪ್ರಸಿದ್ಧ ಸಾಹಿತಿಗಳಾದ ಎಂ. ಕೃಷ್ಣೇಗೌಡ ಮತ್ತು ಹಿರೇಮಗಳೂರು ಕಣ್ಣನ್ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದರು. ಮುದ್ದುರಾಮ ಪ್ರತಿಷ್ಠಾನದ ಅಧ್ಯಕ್ಷ ಕೆ.ಸಿ. ಶಿವಪ್ಪ ಅವರು ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದರು. ಕನ್ನಡ ಸಾಹಿತ್ಯ ಮತ್ತು ಸಂಸ್ಕೃತಿಗೆ ಗಣನೀಯ ಕೊಡುಗೆ ನೀಡಿದ ವ್ಯಕ್ತಿಗಳಿಗೆ ಪ್ರತಿವರ್ಷ ಮುದ್ದುರಾಮ ಪ್ರಶಸ್ತಿಯನ್ನು ನೀಡಲಾಗುತ್ತದೆ.
ವಾಗ್ಮಿ ಹಿರೇಮಗಳೂರು ಕಣ್ಣನ್, ಚೌಪದಿ ಬರಹಗಾರ ಮುತ್ತುಸ್ವಾಮಿ ಅವರಿಗೆ ಮುದ್ದುರಾಮ ಪ್ರತಿಷ್ಠಾನದ ಗೌರವ
ಮೈಸೂರು: ಇಲ್ಲಿನ ಸರಸ್ವತಿಪುರಂನ ಜೆ.ಎಸ್.ಎಸ್. ಮಹಿಳಾ ಕಾಲೇಜಿನಲ್ಲಿ ಭಾನುವಾರ ಮುದ್ದುರಾಮ ಪ್ರತಿಷ್ಠಾನದ ಆಶ್ರಯದಲ್ಲಿ ಆಯೋಜಿಸಲಾಗಿದ್ದ ಕಾರ್ಯಕ್ರಮದಲ್ಲಿ ಖ್ಯಾತ ವಾಗ್ಮಿ ಹಾಗೂ ಸಾಂಸ್ಕೃತಿಕ ಚಿಂತಕ ಹಿರೇಮಗಳೂರು ಕಣ್ಣನ್ ಅವರಿಗೆ ‘ಮುದ್ದುರಾಮ ಪ್ರಶಸ್ತಿ’ ಹಾಗೂ ಚೌಪದಿ ಬರಹಗಾರ ಎಂ. ಮುತ್ತುಸ್ವಾಮಿ ಅವರಿಗೆ ‘ಮುದ್ದುರಾಮ ಪುರಸ್ಕಾರ’ ನೀಡಿ ಗೌರವಿಸಲಾಯಿತು.
ಪ್ರಶಸ್ತಿ ಸ್ವೀಕರಿಸಿ ಮಾತನಾಡಿದ, ‘ಕನ್ನಡದ ಪೂಜಾರಿ’ ಎಂದೇ ಪ್ರಸಿದ್ಧರಾಗಿರುವ ಕಣ್ಣನ್ ಅವರು, “ಆರಂಭದಲ್ಲಿ ನಾನು ಮುದ್ದುರಾಮ ಪ್ರಶಸ್ತಿಯನ್ನು ಸ್ವೀಕರಿಸಲು ಒಪ್ಪಿರಲಿಲ್ಲ. ಆದರೆ ಹಿರಿಯ ಸಾಹಿತಿ ಕೆ.ಸಿ. ಶಿವಪ್ಪ ಅವರ ಮೇಲಿನ ಗೌರವದಿಂದ ಹಾಗೂ ಪ್ರಶಸ್ತಿಯೊಂದಿಗೆ ನೀಡಲಾಗುವ ₹50,000 ನಗದು ಬಹುಮಾನವನ್ನು ಸ್ವೀಕರಿಸುವುದಿಲ್ಲ ಎಂಬ ಷರತ್ತಿನ ಮೇಲೆ ಪ್ರಶಸ್ತಿಯನ್ನು ಒಪ್ಪಿಕೊಂಡೆ. ಅದರಂತೆ, ಪ್ರಶಸ್ತಿ ಮೊತ್ತ ₹50,000 ಮತ್ತು ಪ್ರಯಾಣ ಭತ್ಯೆ ₹2,000 ಸೇರಿದಂತೆ ಒಟ್ಟು ₹52,000 ಹಣವನ್ನು, ನೃತ್ಯ ರೂಪಕಗಳ ಮೂಲಕ ಯುವಜನತೆಯಲ್ಲಿ ದೇಶಭಕ್ತಿಯನ್ನು ಮೂಡಿಸುತ್ತಿರುವ ಮಂಗಳೂರಿನ ‘ಸಂಸ್ಕಾರ ಭಾರತಿ’ ಸಂಸ್ಥೆಗೆ (ಚಂದ್ರಶೇಖರ್ ಶೆಟ್ಟಿ ಅವರು ನಡೆಸುತ್ತಿರುವ) ದೇಣಿಗೆಯಾಗಿ ನೀಡುತ್ತಿದ್ದೇನೆ” ಎಂದು ತಿಳಿಸಿದರು.
ಮುಂದುವರಿದು ಮಾತನಾಡಿದ ಕಣ್ಣನ್, ಮಹಾಪುರುಷರ ಜೀವನದ ಕುರಿತು ಯುವ ಪೀಳಿಗೆಗೆ ಶಿಕ್ಷಣ ನೀಡುವ ಅಗತ್ಯವಿದೆ ಎಂದು ಪ್ರತಿಪಾದಿಸಿದರು.
‘ಮುದ್ದುರಾಮ ಪುರಸ್ಕಾರ’ ಸ್ವೀಕರಿಸಿದ ಚೌಪದಿ ಬರಹಗಾರ ಮುತ್ತುಸ್ವಾಮಿ ಅವರು ಹಿರೇಮಗಳೂರು ಕಣ್ಣನ್ ಅವರ ಹಾದಿಯನ್ನೇ ತುಳಿದು, ತಮಗೆ ಪುರಸ್ಕಾರದೊಂದಿಗೆ ಬಂದ ₹25,000 ನಗದು ಬಹುಮಾನವನ್ನು ಸಾಮಾಜಿಕ ಚಟುವಟಿಕೆಗಳು ಹಾಗೂ ಕೆಲಸಗಳಿಗೆ ವಿನಿಯೋಗಿಸುವುದಾಗಿ ಹೇಳಿದರು.
ಖ್ಯಾತ ಶಿಕ್ಷಣ ತಜ್ಞ ಡಾ. ಗುರುರಾಜ್ ಕರಜಗಿ ಮಾತನಾಡಿ, “ಹಿರೇಮಗಳೂರು ಕಣ್ಣನ್ ಅವರ ಕನ್ನಡ ಭಾಷಣವನ್ನು ಕೇಳುವುದು ಅತ್ಯಂತ ರೋಮಾಂಚನಕಾರಿ. ಕಣ್ಣನ್ ಅವರು ಬಹಿರಂಗವಾಗಿ ಹಾಸ್ಯಪ್ರವೃತ್ತಿಯವರಾಗಿದ್ದರೂ, ಅವರ ಅಂತರಂಗದಲ್ಲಿ ಆಧ್ಯಾತ್ಮಿಕತೆಯಿದೆ. ಇಂತಹ ವ್ಯಕ್ತಿಗಳು ಹೆಚ್ಚಿನ ಸಂಖ್ಯೆಯಲ್ಲಿ ಸಮಾಜಕ್ಕೆ ಬಂದಾಗ ಮಾತ್ರ ಸಮಾಜಕ್ಕೆ ಹೆಚ್ಚು ಅನುಕೂಲವಾಗುತ್ತದೆ” ಎಂದರು.
ಈ ಸಂದರ್ಭದಲ್ಲಿ ಹಿರೇಮಗಳೂರು ಕಣ್ಣನ್ ಅವರ ‘ಮುದ್ದುರಾಮ ಲಹರಿ’ ಪುಸ್ತಕ, ಲೇಖಕಿ ಶ್ವೇತಾ ಪ್ರಕಾಶ್ ಅವರ ‘ಪದ್ಮ ಪಲ್ಲವ’ ಕೃತಿ ಹಾಗೂ ಮುದ್ದುರಾಮ ಪ್ರತಿಷ್ಠಾನದ ಕಾರ್ಯದರ್ಶಿ ಆರ್.ಎ. ಚೇತನ್ ರಾಮ್ ಅವರ ‘ಸಾಧ್ಯವೆಂದರೆ ಸಾಧ್ಯ’ ಕೃತಿಯನ್ನು (ಮೂರನೇ ಆವೃತ್ತಿ) ಬಿಡುಗಡೆ ಮಾಡಲಾಯಿತು.